औषध व्यवसाय हा केवळ व्यापार नाही, तर समाजसेवा — आमदार डॉ. संजय कुटे यांचा गौरव सत्कार
संग्रामपूर, ता. प्रतिनिधी —
जागतिक औषध निर्माता दिनानिमित्त महाराष्ट्र राज्य औषध व्यवसाय परिषद, ड्रग इन्फॉर्मेशन सेंटर मुंबई यांच्या वतीने संपूर्ण राज्यात "फार्मा सप्ताह" चे आयोजन करण्यात आले. या सप्ताहात विविध जिल्ह्यांमध्ये औषध जनजागृती, आरोग्य तपासणी शिबिरे, आणि सामाजिक उपक्रम राबवले गेले. अमरावती झोनमधून संग्रामपूर तालुका केमिस्ट अँड ड्रगिस्ट असोसिएशनने उत्कृष्ट कार्य करून प्रथम क्रमांक पटकावला तालुक्यातील असोसिएशनने विविध गावांमध्ये आरोग्य तपासणी शिबिरे, औषध विषयक जनजागृती मोहिमा, निबंध स्पर्धा तसेच मुदतबाह्य औषधांचे संकलन व योग्य व्यवस्थापन करून समाजाभिमुख कार्य केले. या उपक्रमांमुळे फार्मासिस्टचे समाजातील स्थान अधोरेखित झाले या उल्लेखनीय कार्याची दखल घेत जळगाव जामोद मतदारसंघाचे आमदार डॉ. संजय श्रीरामजी कुटे यांनी संग्रामपूर तालुक्यातील फार्मासिस्ट व केमिस्ट बांधवांचा पुष्पगुच्छ देऊन सत्कार केला. यावेळी त्यांनी फार्मासिस्टच्या भूमिकेचे कौतुक करत गौरव उद्गार काढले:
> "फार्मासिस्ट हा केवळ औषध विक्रेता नसून समाजाचा आरोग्य मित्र आहे. औषध वितरण व्यवसाय करताना येणाऱ्या अडचणींवर मात करत, ते समाजाच्या आरोग्य रक्षणासाठी महत्त्वपूर्ण योगदान देतात."
> "संग्रामपूर तालुक्याने फार्मा सप्ताहात केलेले कार्य हे इतर तालुक्यांसाठी प्रेरणादायी आहे. औषध व्यवसाय हा केवळ आर्थिक व्यवहार नसून एक सामाजिक जबाबदारी आहे."
सत्कार प्रसंगी संग्रामपूर तालुका केमिस्ट अँड ड्रगिस्ट असोसिएशनचे अध्यक्ष उमेश इंगळे, तसेच पदाधिकारी रितेश भाऊ कुलवाल, मोहन रावणकर, अनिकेत उमरकर, मंगेश राऊत, फैजान खान, आशिष सातव आणि तालुक्यातील अनेक फार्मासिस्ट व केमिस्ट बांधव उपस्थित होते या उपक्रमामुळे औषध व्यवसायाला सामाजिक प्रतिष्ठा प्राप्त झाली असून, संग्रामपूर तालुका केमिस्ट अँड ड्रगिस्ट असोसिएशनने समाजाच्या आरोग्य संवर्धनासाठी घेतलेली पुढाकाराची भूमिका विशेष उल्लेखनीय ठरली आहे
